Լեզու սովորելու կարևորությունը

Ներկայումս մենք ապրում ենք միանգամայն գլոբալացված աշխարհում, որտեղ բոլորս միմյանց հետ կապի մեջ ենք գտնվում։ Ահա թե ինչու լեզուներ սովորելը հիանալի գործիք է հաղորդակցման և, իհարկե, մասնագիտական առաջընթացի համար։ Որքան էլ խորհուրդ է տրվում դեռ մանկուց սովորել նոր լեզուներ, այնուամենայինիվ, լեզվական հմտություններ ձեռք բերելը երբեք էլ ուշ չէ։ Այս անգամ DNA-ի հետ կբացահայտենք, թե ինչպիսինն է լեզուների դերը մասնագիտություն ընտրելիս։

Լեզու սովորելու առավելությունները

• Զարգացնում է լեզվական հմտություններն ու մտածողությունը
• Օգտագործվում է մարդկային զարգացման գրեթե բոլոր ոլորտներում
• Ընդլայնում է աշխատանք գտնելու ու միջազգային ծրագրերին մասնակցելու հնարավորությունները
• Լեզվակրի հետ շփումը և լեզվամշակույթն ուսումնասիրելը
• Մեկ լեզվի իմացությունը օգնում է մեկ այլ լեզու սովորել և հասկանալ

Լեզուն որպես մասնագիտություն

Շատերի համար լեզու սովորելը համարվում է պարզապես զբաղմունք կամ պարտադիր պայման է գոնե 1 լեզվի իմացությունը, իսկ որոշները սովորում են այն որպես մասնագիտություն, և, իհարեկե, այս պարագայում շատ կարևոր է լեզվի լավ իմացությունը, գիտելիքների պաշարն ու դասավանդման փորձը։ Այսօր էլ մեծ թիվ են կազմում լեզվի մասնագետները, ովքեր ավելի խորքային ուսումնասիրություններ են կատարում, քանի որ ժամանակին զուգահեռ այս մասնագիտությունը ևս փոփոխություններ է կրում, և մշակվում են ուսուցմնան ինտերակտիվ մեթոդներ։

Լեզուների դերը այլ մասնագիտություններում

• Բժշկություն

Բժշկական ոլորտում մեծ նշանակություն ունի լեզուների իմացությունը, հատկապես լատիներենը, քանի որ շատ տերմիններ հենց այս լեզվով են։ Ռուսերենը և անգլերենը նույնպես ուրույն տեղ ունեն, հաշվի առնելով, որ միջազգային գրականության մեծ մասը գրված է անգլերեն, իսկ նախկին ԽՍՀՄ երկրների բժշկագիտական փորձը ամփոփված է առավելապես ռուսերենով։ Քանի որ կա չթարգմանված գերմանալեզու ունիկալ բժշկագիտական գրականություն, ուստի բացի անգլերենից, օգտակար կլինի իմանալ գերմաներեն։ Լրացուցիչ լեզուների իմացությունը կարող է երբեմն արդյունավետ լինել բժշկի համար, երբ անհրաժեշտ է լինում հետազոտել այլազգի հիվանդի, ով բացի իր մայրենի լեզվից չի տիրապետում որևէ այլ լեզվի։

• Թվային Մարքեթինգ

Լինելով ամենաթրենդային մասնագիտություններից մեկը՝ պարտադիր է անգլերենի և ռուսերենի իմացությունը, քանի որ այն մեծ պահանջարկ ունի և՛ Հայաստանում, և՛ արտասահմանում, հատկապես տարբեր կազմակերպությունների հետ համագործակցելիս։

• Թարգմանչություն

Այս մասնագիտությունն ընտրելիս միայն լեզվի իմացությունը բավարար չէ․ պահանջվում են մեծ ջանքեր, համապատասխան հմտությունների ձևավորում, տարբեր ոլորտների բառապաշարի տիրապետում, ճկուն միտք և հղկված խոսք։

• Միջազգային հարաբերություններ

Անգլերենը, լինելով միջազգային լեզու, իր նշանակալի ազդեցությունն ունի վերոնշյալ մասնագիտության մեջ։ Պետական կամ միջազգային կառույցներում գործունեություն ծավալելիս՝ իսպաներենին, ֆրանսերենին կամ իտալերենին տիրապետելը ցանկալի է։

• Տուրիզմ

Տուրիստական ոլորտում լեզուների իմացությունը համարվում է ամենաանհրաժեշտ հմտություններից մեկը, հատկապես էքսկուրսավարների համար։ Կազմվում են տարբեր լեզուներով տուրիստական խմբեր, որոնց համար որակյալ էքսկուրսիաներ իրականացնելու համար հարկավոր է տվյալ լեզվի գերազանց իմացություն։

• Ծրագրավորում

Բացի ազգային լեզուներից, կան նաև ծրագրավորման լեզուներ։ Դրանք հրահանգների և ազդանշանների յուրահատուկ համակարգ են, մի յուրօրինակ «լեզու», որով մարդը հնարավորություն է ստանում «շփվել» համակարգիչների՝ մեքենաների հետ, տալ անհրաժեշտ հրահանգներ՝ գործընթացները պատշաճ իրականացնելու համար։ Առանց ծրագրավորման լեզուների ստեղծման և իմացության անհնար կլիներ ներկայիս գիտատեխնոլոգիական առաջընթացին հասնելը։

• Անթրոպոլոգիա, Ազգագրություն

Լեզուների իմացությունը, դրանց ծագումնաբանության և ստուգաբանության ուսումնասիրումը, ֆոնետիկ առանձնահատկությունների հետազոտումը գիտնականներին թույլ է տալիս առավել ընդգրկուն պատկերացում կազմել մարդու ծագման, էթնիկ խմբերի, միգրացիաների և տարբեր ռասայական խմբերի միջև առկա կապերի ու փոխհարաբերությունների մասին։

• Հնէաբանություն, Պատմություն

Հին դարերում եղած պատմական իրադարձությունների մասին լիարժեք պատկերացում կազմելն անհնար կլիներ առանց լեզուների ուսումնասիրման (օրինակ՝ հին հունարեն, հին եգիպտերեն, սանսկրիտ և այլ)։ Հնէաբանական պեղումների ընթացքում հայտնաբերված արձանագրությունները, ինչպես նաև հնուց հասած ձեռագրերը, մեզ են փոխանցում արժեքավոր տեղեկություն հազարամյակներ առաջ տեղի ունեցած իրադարձությունների, կենցաղի և երևույթների մասին։

Ամենակարևոր լեզուները, որոնք Ձեզ կծառայեն ակադեմիական և մասնագիտական կյանքում

1․Անգլերեն – աշխարհում առավել շատ ուսումնասիրվող, բիզնեսում, միջազգաին առևտրում և ինտերնետում ամենից տարածված լեզուն է։ Խոսում են 5 մայրցամաքներում, իսկ գործածումն առաջնային է մի քանի ամենահզոր երկներում (ԱՄՆ, Միացյալ Թագավորություն, Կանդա, Ավստրալիա)։

2․Չինարեն – Ավելի քան 1 միլիարդ մարդ խոսում է, առանձնահատուկ կարևորություն ունի ասիական շուկայում։ Հայաստանում նույնպես ուսուցանվում է որոշ համալսարաններում, ինչպես նաև Հայ-չինական բարեկամության դպրոցում, լեզվի կենտրոններում։

3․Իսպաներեն – Անգլերենից և չինարենից հետո աշխարհի ամենատարածված և իհարկե ամենաչքնաղ լեզուներից մեկը։ 21 երկրներում պաշտոնական լեզու է։ Ողջ երկրագնդում ավելի քան 400 միլիոն բնիկ իսպանախոսներ կան, և գիտնականները փաստում են, որ մոտ 2050 թվականին 530 միլիոնից ավել կլինի իսպանախոսների թիվը, նույնիսկ կդառնա միջազգային լեզու՝ առաջ անցնելով անգլերենից։ Համարվում է նաև համացանցի լեզու, քանի որ գրեթե 5%-ը բազմալեզու ինտերնետային էջերի օգտագործում է իսպաներենը։ ՄԱԿ-ի պաշտոնական լեզուներից է։

4․Ֆրանսերեն – Ավելի քան 200 միլիոն մարդ խոսում է այս լեզվով։ Աշխարհի շատ հատվածներում համարվում է որպես 2-րդ լեզու, որն ուսումնասիրվում է գերազանցապես դպրոցներում։ Ավելի մեծ հասանելիություն է տրվում աշխատաշուկայում։ Համացանցում 3-րդ տեղն է զբաղեցնում իսպաներենից հետո։ Բացի այդ միջազգային կազմակերպությունների և հաստատությունների լեզու է (Ինչպես օրինակ՝ ՄԱԿ, Կարմիր Խաչ, ՅՈՒՆԵՍԿՈ, ԵՄ):

5․Պորտուգալերեն – 5-րդ ամենատարածված լեզուն է երկրագնդում։ 270 միլիոն մարդ խոսում է պորտուգալերեն։ Վերջին տարիներին պահանջարկը ընդլայնվում է։ Այս լեզվի իմացությամբ կարող եք աշխատել Պորտուգալիայում, Բրազիլիայում։

6․Իտալերեն – ԵՄ-ի պաշտոնական լեզուներից է։ Լեզվին տիրապետելով, ինքնուրունյն կարող եք բացահայտել ողջ երկիրը, մշակույթն ու խոհանոցը, և ի վերջո շփվել տեղացիների հետ։ Իտալերենը կարող ենք համարել լատիներենի ամենամոտ ժառանգը, և իտալերենի իմացությունը, անշուշտ, անչափ հեշտացնում է լատինական ծագում ունեցող մյուս լեզուների ուսումնասիրումը։

Լեզուների ուսուցման օնլայն հարթակներ

1․Անգլերեն

2․Չինարեն

3. Իսպաներեն

4․Ֆրանսերեն

5․Պորտուգալերեն

6. Իտալերեն

Այսպիսով, կարող ենք ընդհանրացնել, որ, անկախ մասնագիտությունից, լեզուներ իմանալը մեծ առավելություն է, հնարավոր է դարձնում ինքնակրթվել և զարգանալ, պատրաստ լինել նոր մարտահրավերներին։

Հեղինակ՝ Անուշ Մկրտչյան